Feedback sagt zuerst einmal viel aus über die Person, die Feedback gibt und wenig über dich. Wenn du zu den Menschen gehörst, die fähig sind, aus der Perspektive des anderen Menschen zuzuhören, kannst du Feedback, das eigentlich dir gilt, dazu benützen, in deinem Gegenüber lesen!
Feedback – das isch i allne Müüler: Mer will sich uuschotze – emene andere s Züüg woner usegla hät, zruggschoppe. Gfröget oder ungfröget. Hobbypsychologisch und drum übergriffig heisst das «spiegle». Und dänn mit ungfrögete Raatschläg iidecke. «Ich meins nu guet mit dir.» Würkli?
Du wotsch mich grad ändere. Du bisch nöd zfride mit mir, so wien ich bin. Vor allem, wänn ich guet bin und fröid dra ha, wotsch du mich ändere. Was isch guet gmeint da dra?
Wänn du mir en Spiegel vor d Nase setzisch – wer gsehn ich dänn da drin? Öppe miich? Gsehn ich miich, wänn ich am Morgen in Spiegel luege? Nei, ich gseh a mich here und das erscht na spiegelverchert! Ich aber känn mich vo ine her und vo aafang a!
Feedback entgäge näh mues i öisere Gsellschaft schiints jede, wo will dezue ghöre. Was heisst dezue ghöre? Mit Feedback gäh chamer d Mänsche gfüegig mache. Me cha sie für sini Zwäck inschtrumäntalisiere.
Es isch nämli so: Zerscht sait Feedback öppis uus über dä, wo Feedback git: Isch er en Vorurteilsmänsch, wo nu cha «uufnäh», was er scho i sich ine hät? Isch mini Feedback-Geberin öpper, wo mit Schüüchchlappe durs Läbe gaht und d Realität nöd gseht? Isch de Feedback-Geber öpper, wo us Erfahrige nöd cha lehre, aber sehr gnau weiss, was d Wahret isch? Häsch du vilicht en innere Konflikt mit dir sälber, wo du nöd wotsch wahr ha? Fühlsch du dich öppe wäge dem so betupft und wotsch miich ändere?
Es git Lüüt, die schüüssed grad zrugg, sobald mer in Wald rüeft. Debii han i gar nöd gschosse, nu grüeft. Ich hett nämli gern es Echo uf das, won i gsait ha, won i gmacht ha, won i stolz druuf bi. Ich möchti gern d Fröid teile. Mämal bruuch i au Troscht.
Ja, Feedback gäh bedüütet Ateil nä. Ateil a de Fröid und am Fruscht. Es bedütet, Perschpektive mitenand z teile statt mich mit eme Spiegel z konfrontiere: Du machsch bi dir Platz für miich und ich gib dir Ruum für dini Art, d Sache zgseh.
Egal, wie du das machsch: Nach emene sogenannte Feedback-Gspröch weiss ich vor allem, was du für en Typ bisch: Ob du mit feschtgfahrne Vorurteil durs Läbe gasch oder ob du offe bisch für Ideeä – vor allem wänn sie dir nöd sälber in Sinn cho sind ...
Ich gseh, was für Erfahrigsrüüm du häsch und wie wiit du parat bisch, die mit andere Mänsche z teile. Ich gspüre dini Unsicherheite und innere Konflikt. Ich merke, wänns immer nu um dich sälber gaht.
Käs wunder, dass vill Mänsche nöd gern Feedback gänd, wämer sie frögt. Aber ungfröget, wämer nöd muess begründe, was mer sait, und erscht rächt anonym – da wird zuegschlage!!
Kommentar schreiben